Gintingob it lokal nga gobyerno it Kalibo ro monitoring team kontra sa pagbantay sa African Swine Fever ukon ASF.
Gintaw-an raya it bag-ong pangaean nga Task Force on ASF (African Swine Fever) ag Bantay Karne it Municipal Agriculture Office it lokal nga gobyerno it Kalibo.
Suno kay municipal agriculture officer Uriel Las Piñas it LGU Kalibo, ro task force hay ginakaeakipan it nagkaeain-eain nga taeatapan kon siin tuyo kara nga mapabaskog ro pagbantay sa mga strategic areas eabi eon sa mga entry points pasueod sa banwa it Kalibo.
Hugot ro kampanya it natungdan nga taeatapan agud nga inde makasueod ro ginakabaeak-an nga ASF virus bangud nga posibleng makaapekto raya sa pangabuhian it mga manugbaboy ukon mga hog raisers.
Mag-eowas kara, ginabawaean man ro mga karne ukon maging ro processed food products maghalin sa mga kaeapit probinsya bilang pagdahan nga inde makasueod ro virus sa banwa it Kalibo ag bilog nga probinsya it Aklan.
Makaalarma suno kay Las Piñas ro pagkalista it kaso it ASF sa pilang ka banwa sa probinsya it Iloilo ag ko ulihi eamang hay may napabalita man sa probinsya it Capiz ag sa pag-usisa hay negatibo raya sa virus.
Maging responsable suno kana ro tanan ag inde eon maghana nga magdaea it mga karne it baboy ukon processed pork products maghalin sa nasambit nga mga probinsya para sa kaeowasan it alagang sapat sa bilog nga probinsya it Aklan
