Ro La Niña man ro ginapahauman it government task force nga nauna eon nga gintaw-an it mandato para magsabat sa El Niño phenomenon.
Suno kay Presidential Communications Office Assistant Secretary Joey Villarama, spokesperson it Task Force El Niño, pagabayluhan eon nanda ro Task Force El Nino ag paga-obrahon nga Task Force La Niña sa pag-umpisa it nasambit nga weather phenomenon.
Gusto sigon nanda nga sangkiri nga mga mangunguma, mangingisda ag iba ro maapektuhan.
Apang bangud sa mitigation efforts ag interventions, maskin paalin hay napahagan-hagan ro epekto it El Niño sa nasyon.
Dugang pa ni Villarama nga mas ginakabaeak-an it Department of Agriculture (DA) ro La Niña bangud nga kon magbuhos ro mabaskog nga uean ag bahaon ro agricultural lands, medyo mabudlay eon nga irecover ro kahalitan nga tuga it pagbaha.
Ko Biyernes, Hunyo 7, hay opisyal eon nga gindeklara it PAGASA ro pagtapos it El Niño phenomenon.
Sa pihak kara, ginpaandam ro pagtama it La Nina nga posibleng maga-umpisa sa Agosto ag magabuhay hasta sa ulihing parte it tatlong buean it dag-on.
Ro La Niña phenomenon hay naga-angkon it above-normal rainfall conditions.
