KALIBO, Aklan–Kumpiyansa ro grupo it mga negosyante sa Isla it Boracay nga mabahoe nga bulig sa uman nga pagbaskog it turismo sa nasyon ro owa eon pag-obliga sa mga turistang magsuksok it face mask ag magpakita it andang proof of full COVID-19 vaccination nga maga-agto sa mga tourist spots sa Pilipinas.
Nagapati si Ma. Elena Tusco Brugger, Advisory Chairman it Philippine Chamber of Commerce and Industry (PCCI)-Boracay nga ro ginpaguwa nga bag-ong memorandum it Department of Tourism (DOT) hay senyales agud nga madugangan ro numero it mga turistang magabisita sa isla eabi eon makaron nga summer season.
Ro pagsuksok sigon it face mask ag pagpakita it vaccination card ro pila sa mga ginareklamo it mga turista sa Boracay eabi eon ro mga dumueuong nga bisita.
Magapabilin eon lang sigon nga choice it sangka bakasyunista kun magagamit imaw it face mask ukon indi.
Dugang pa ni Brugger nga nagapamatuod eamang raya nga bukas eon ro nasyon sa turismo.
Sa makaron, ro pagsuksok it face masks sa indoor ag outdoor settings sa nasyon hay boluntaryo, base sa executive order nga ginpaguwa it Malakanyang ko Oktubre it nagtaliwan nga dag-on.
Sa pihak nga parte, handum man it PCCI-Boracay nga makaangkon eon it sangka ticketing area sa Caticlan jetty port agud nga malikawan ro pag-agto it mga bisita sa nagkaeain-eain nga window para andang mga pagabayaran antes nga makasueod sa isla.
