KALIBO, Aklan—Madinaeag-on nga naibutang it civil society group nga Atin Ito Coalition ro mga symbolic markers ukon buoya nga markado it mga katagang “West Philippine Sea ATIN ITO” sa sueod it exclusive economic zone it Pilipinas.
Sa kasagsagan raya it ginkasa nga ikaywang civilian supply mission it nasambit nga grupo sa bahin it West Philippine Sea.
Suno sa organizer it Atin Ito Coalition, mag-eowas kara hay naging madinaeag-on man ro andang pagpatigayon it peace and solidarity regatta nga ginakaeakipan it limang Civilian marine vessels, ag 100 nga mga maisot nga baroto.
Samtang, nagpanupod man ro nasambit nga sibilyang grupo kaibahan ro iba pang mga volunteers it mga donasyong supply kaparehas it langis ag Food packs sa mga Pilipinong mangingisda nga nagaeayag sa nasambit nga lugar.
Madumduman nga ro nagpangunang katuyuan it mga raya hay maabot ro bisinidad it Panatag Shoal ukon ro Bajo de Masinloc shoal para magpanupod it mga supply ag donasyon sa mga mangingisdang idto.
