KALIBO, Aklan—Nagpasa it sangka resolution si Kalibo Sangguniang Bayan member Matt Aaron Guzman angot sa pagpangayo it pondo sa Philippine Amusement and Gaming Corporation (PAGCOR) para sa pagpatindog it dugang nga evacuation center sa banwa it Kalibo.
Nakabaehag sa resolution ni Guzman ro pagpangayo it pondo para sa igapatindog nga evacuation center nga may kompletong pasilidad.
Ro nasambit nga tikang suno kana hay bilang preparasyon eon man sa mga kalamidad eabi pa ag masami eon ro serye it mga pagbaha sa Kalibo kada tyempo it tag-uean.
Bangud sa naga-inabo nga populasyon it banwa, nagakadapat eamang sigon nga madugangan ro mga evacuation center para malikawan ro pagdueotdutan it mga tawo.
Tuyo sigon kara nga makaao it insigidang solusyon sa tyempo it kalamidad.
Engkaso nga maaprubahan it PAGCOR ro anang request, target sigon nanda raya nga ipatindog sa bahin it Brgy. Nalook, Kalibo.
