KALIBO, Aklan–Ginkansela man ro pagdungka it sambilog pang cruise ship nga may sakay nga mga turista kaina it agahon sa isla it Boracay bangud sa mabaskog nga humbak.
Madumduman nga ko nagtaliwan nga domingo hay naunsiyamo man ro pagdungka it sambilog pang cruise ship nga MS Seaborne Encore bangud man sa maeain nga tiempo.
Suno kay Coast Guard Senior Chief Petty Officer Dominador Salvino it PCG-Aklan nga gindesisyunan it management ag kapitan it barko nga MS Nautica Oceania nga indi eon pagpadayunon ro pagdungka kara para sa seguridad it mga turista.
Nagapabilin sigon nga mabudlay ro pagdungka it mga cruise ship sa isla bangud nga owa it gintaeana nga port para kara.
Bangud sa kawad-an it port, nagadungka ro cruise ship sa katung-anan it eawod nga sakop it boracay ag ginasueang ro mga turista it mga speed boat.
Nagderetso eon lang ro barko sa masunod nga destinasyon sa Manila.
Samtang, bangud nga owa it ginpaguwa nga gail warning ro PAGASA sa Aklan, padayun ro tanan nga water sports activities sa isla it Boracay kamana man ro biyahe it mga roro vessels paagto sa Batangas ag Mindoro port.
Samtang, kanselado ro biyahe it mga pump boat halin sa Caticlan to Romblon vice versa bangud sa ginpaguwa nga gail warning sa nasambit nga probinsiya.
