Temporaryong ginpundo ro paghigop sa nabilin nga kargang langis it nag-eogdang nga MT Terranova para taw-an it daean ro pag-unload it narekober nga oily waste sa may Orion Dockyard sa probinsya it Bataan.
Sa oras nga makumpleto ro pagsaylo it nakolektang langis, pagadaehon raya sa sangka treatment facility para sa maayos nga pagpilak base sa kumpirmasyon it Philippine Coast Guard.
Nakakolekta man ro ginkontratang salvor it Pilipinas nga Harbor Star it masobra sa 903,000 nga litro it oily waste halin sa motor tanker halin ko Agosto 19 hasta it 29.
Samtang, nagpatigayon man it aerial surveillance ro BRP Sindangan sa ground zero ag nagpatigayon it monitoring ro mga personnel kara sa kaeapit nga shoreline para sa posibleng mantsa it oil sheen apang uwa it naobserbahan sa parehong operasyon.
Samtang, sa kaso mat-a it nag-eogdang nga MTKR Jason Bradley, padayon ro re-sealing ag patching operation sa manhole ag air vents it barko.
Sa ginpatigayon nga pagpatrolya it Oil Response Team sa coastline, uwa man it naobserbahang oil sheen.
