BANGA, Aklan–Owa it foul play sa pagkamatay it 15 anyos nga si Jhuros Flores nga naeumos samtang nagapaligos kaibahan ro anang mga kaklase ag kabarkada sa aklan river nga sakop it Brgy. Polo, Banga ko nagtaliwan nga Enero 29, 2025.
Raya hay base sa official statement nga ginpaguwa it Banga Municipal Police Station nga pirmado ni P/Capt Dandy Gonzalodo, acting chief of police it Banga Municipal Police Station.
Raya hay kasunod it pagtuhaw it mga saea nga impormasyon ag pasibangud angot sa insidente nga nagtuga it pagduda ag pagpataeang sa publiko.
Nagatuhaw sigon sa imbestigasyon it kapulisan nga aksidente ro natabu.
Maskin sigon ro pamilya it biktima ag mga tawong nakasaksi sa natabu hay nagpahayag nga owa it foul play sa insidente.
Bangud kara, nagapanawagan ro Banga PNP sa publiko, eabi eon sa mga social media influencer ag sa mga netizens sa pangkabilugan nga maskin nga ro kada isaea hay nagahandum it kamatuoran ag nagatinguha nga makit-an eon ro biktima, gina engganyo nanda ro tanan nga likawan nga magpakalhit it mga espekulasyon, owa it basehan nga mga pasibangud ag pagdaea kara sa social media.
Raya hay nagatuga sigon it saea nga impormasyon nga nagapadugang pa sa kalisod it pamilya it biktima, kamana man ro andang mga amigo ag kaklase nga nakasaksi sa insidente.
Dugang pa nga kinahangean man sigon nga maging mapag-usisa ro publiko ag maging responsable sa pagtumod it ‘fake news’ ag ‘dummy accounts.’
Kadungan kara, nagpaandam ro kapulisan sa mga naga-obra it ‘dummy accounts’ ag nagapakalhit it ‘fake news’ kun sa siin raya hay may nagakaigo nga penalidad sandig sa laye nga naga-eksister.
