Makasueubo kun isipon nga mismong sambilog sa mga opisyal it gobyerno ro naga-kwestyon sa pagpanag-iya it Pilipinas sa Kalayaan Group of Islands.
Raya hay kasunod it naging mensahe ni Sen. Rodante Marcoleta nga i-tao eon lang sigon ro nasambit nga isla sa China.
Suno kay former Magdalo Partylist Representative Gary Alejano, nag-angkon eon it extensive discussion sa nasambit nga issue ku tyempo pa it administrasyon ni dating pangueong Benigno Aquino III., kun sa siin nabuksan ro kamalayan it publiko sa mga isyu West Philippine Sea.
Makasueubo sigon makaron nga biskan uwa it ginahimong pagdepensa ro China, hay may mga mataas nga opisyal eon it Pilipinas ro naga-depensa para kanda.
Dugang pa nana nga bangud kara, maabong Pilipino ro nadadaea sa naratibong indi eon dapat makipag-away ro nasyon sa China bangud nga basi mauli raya sa gyera ag indi makaya it nasyon nga dumepensa.
Raya sigon hay makabig nga bulok nga pag-iisip bangud nga maabong paagi nga pwedeng himuon para nga isukoe ro kinamatarong nga uwa naga-abot sa gyera.
Paathag pa ni Alejano, dapat maging mapagmatyga ro publiko ag indi magpadaea-daea sa mga “pagpahumot” it pangaean it pilang opisyales it gobyerno ag dapat nga isukoe ro kinamatarong bilang mga Pilipino.
