KALIBO, Aklan — Owa man nagtuga it grabeng kahalitan sa mga baeay ag iba pang mga istraktura ro pag-agi it sangka gina-alegar nga ipu-ipo kasunod it naeksperyensiyahan nga pagbubu it mabaskog nga uean sa Brgy. Pook, Kalibo partikular sa jetty port, gabi-i it Domingo.
Suno kay Punong Barangay Lodi Pinos it nasambit nga lugar nga sa mayad nga swerte ag natabu ro insidente pagkatapos it concert it sikat nga rapper/singer nga si Flow G nga gindumog it maabu nga tumaean-aw.
Eubus nga naapektuhan sigon ro mga tent it mga nagabaligya sa lugar ag ginbutang nga mga barikada nga nagkaeatumba.
Owa man naka-eowas ro sangka steel nga poste sa may parte it stage nga medyu naghapay.
Apang owa suno kana it may gin-report nga mga baeay nga na-damaged ag residente nga naninahan.
Ginsaysay pa ni Kapitan Pinos nga nakibot man sanda sa natabu ag nabatyagan nanda ro pwersa it hangin nga nagatiyog-tiyog kabi-i.
Sa video nga nabo-oe it Bombo Kalibo, makita ro gin-aywan nga kahalitan it ipu-ipo.
Sa pihak nga parte, bangud sa pagdagsa it mga pumueuyu nga nagaselebrar it Kapistahan ni Sr. San Juan de Bautista sa Pook jetty port, uman nana nga ginapanawagan nga himuson ro andang mga basura ag mas pang doblehon ro pagdahan agud nga makalikaw sa anuman nga aksidente.
Nakabantay sigon ro barangay council ag mga katapo it Municipal Disaster Risk Reduction and Management Office (MDRRMO)-Kalibo hasta nga matapos ro selebrasyon.
