KALIBO, Aklan—Ginaeauman nga magiging bag-ong atraksyon sa banwa it Kalibo ro pagpanami sa kalye Rizal nga paga-obrahon bilang Chinatown.
Suno kay sangguniang bayan member Ronald Marte nga kaibahan sa plano ni Kalibo mayor Juris Sucro hay pagpanami sa lugar partikular ro pagbutang it arko nga may pangaean nga Kalibo Chinatown sa kanto it 19 Martyrs ag Rizal St. ag corner it Maagma ag Rizal St.
Mag-eowas kara, pagabutangan man ro lugar it mga lantern ag mga lamp post kapareho it Binondo.
Gusto man nga makipag-istorya it LGU sa mga negosyante agud nga butangan ro lugar it mga Chinese jewelry stores, Chinese Restaurants ag iba pa.
Ginaduso suno kana it LGU nga mas pang mapabaskog ro turismo sa banwa pinaagi sa pag-create it mga bag-o nga pamasyaran.
Sa pihak nga parte, ginpahayag ni Kalibo vice mayor Cynthia dela Cruz nga naga-ugyon kita sa selebrasyon it Chinese New Year bilang pagkilaea sa historical, cultural ag economic nga kontribusyon it Filipino-Chinse community sa development it banwa it Kalibo.
Raya eon ro ikaywang dag-on it selebrasyon it Chinese new year sa kalye rizal nga ginpahaum it lgu kalibo pinaagi sa pagbukas it Chinese Street Market and Bazaar .
Madumduman nga si vice mayor Dela Cruz ro nag-author it sangka resolution nga paga obrahon nga landmark nga China Town ro nasambit nga kalye.
Ro Rizal Street hay kilaea dati sa tawag nga “Escolta” ag tamang lugar para sa mga naganegosyo bangud nga maeapit raya sa Cathedral, lumang public market ag sa Pastrana park.
Mag-eowas kara, aeagyan man raya it prosisyon kada holy week, Ati-atihan ag iba pang special events sa banwa.
