KALIBO, Aklan–Mabahoe nga paealigban sa tag-anang si Irene Casim kon sin-o ro responsable sa paeanakawan.
Masyado suno kana nga malimpyo ro pagka-obra sa krimen.
Mag-eowas nga ginbo-oe it manakaw ro modem it CCTV camera agud nga owa it marekober nga recordings hay owa man it forcible entry ukon owa ginpwersa ro pagbukas it pwertahan.
Sa pag-imbestiga it kapulisan, owa it narekober nga finger prints ag maskin foot prints.
Posible sigon nga nagsuksok it gwantis ro manakaw ag nag-uba it suksok nga sapatos ag naka-medyas eamang sa pagsueod sa opisina.
Ginpahayag dugang ni Mrs. Casim nga pasado alas-10 eon sanda naka-uli kabi-e it anang mister bangud nga nagpahuyap pa sanda it kita ag nagpahueaw it uean.
Sa mayad nga swerte man suno kana ag natigayon nana nga madeposito kahapon ro kita nanda ko nagtaliwan nga mga inadlaw nga kapin sa 700,000 pesos.
Nagapati man imaw nga kilaea nana ro suspek.
Sa makaron hay gina-estudyuhan ro iba pang CCTV camera nga maeapit sa lugar.
