Sa unang kahigayunan hay nagpahayag eun ro gobyerno it indonesia parte sa daeayon nga paghalin kay Mary Jane Veloso iya sa Pilipinas.
Sa sangka pahayag, ginhambae ni Indonesian Chief Minister for Law and Human Rights Yusril Ihza Mahendra nga ro desisyon agud maihalin si Veloso iya sa Pilipinas hay kasunod man it nauna nga hinyo it administrasyong Marcos.
Suno kay Mahendra, naghimo ro Indonesia it bag-ong polisiya nga uwa kara dati ginahimo.
Raya hay ro pagsugot nga mapahilway o mahimuan it pardon ro mga dumueong nga ginhatulan eun it korte it Indonesia.
Sa baylo, ginasugtan eun sigon it Indonesian government nga maihalin ro mga convicted foreigner.
Ginsahalimbawa ni Mahendra ro kaso ni Veloso kun siin igahalin eun imaw sa Pilipinas, kinahaeangan iserbi ni Veloso ro life sentence kabaylo it death sentence nga hatol kana it Indonesia.
Apisar kara, ginarespeto sigon it Indonesian government ro gahom it Philippine government nga ginapatuman ro mga layi kara.
Kun maibalik eun sa Pilipinas si Veloso, pagarespetuhon man it Indonesia ro otoridad ni Pangueong Ferdinand ”Bong-bong” Marcos Jr. ag kun magtao man imaw it pardon sa Pinay drug convict, una kana ro desisyon kara.
Suno pa kay Mahendra, ro Pilipinas ag iba pa nga mga nasyon ro nagatuyo nga mag-angkon it ‘transfer of prisoner’ hay kinahangean eamang respetuhon ag kilaeanhon ro verdict it mga Indonesian court.
Kadungan kara hay ginpamilit man nana nga dapat kilaeanhon it mga nasambit nga nasyon nga may kinamatarong ro Indonesia nga usigin ag hatulan ro mga foreign citizen kun makahimo ro mga raya it anuman nga krimen sa Indonnesia.
Angot kara hay indi dapat kwestyunon it ibang nasyon ro gintao it Indonesian court nga verdict pareho it pagkakulong, bugkos kabuhi nga pagkakulong o death penalty.
