KALIBO, Aklan—Naging madinaeag-on ro pakikipagpueong ni Pangueong Ferdinand Marcos, Jr. kay US president Joe Biden sa sidelines it United Nations General Assembly sa New York City.
Suno kay Bombo International Correspondent Greg Aguilar it California, USA nga nagpromisa si Marcos kay Biden nga mas pang pagapabaskugon ro relasyon sa Estados Unidos nga ginakabig nga mabuhay eon nga kaalyado it Pilipinas.
Makabig suno kana nga makasaysayan ro pueong it daywang lider nga ginkalipay it Filipino community sa US.
Nagpahayag pa suno kana it pageaum si PBBM nga mas pang mapabilin it daywang nasyon ro kalinong sa pihak it mga problema nga nagtuhaw sa mga nagtaliwan nga binuean.
Samtang, handum sigon ni Biden nga makaangkon it mabakod nga relasyon sa Pilipinas matapos nga gin-describe kara nga nakaangkon it “rocky times” sa mga nagtaliwan nga paniempo partikular sa termino ni dating pangueong Rodrigo Duterte.
Gindugang pa ni Aguilar nga ginpasaeamatan man ni Biden ro Pilipinas sa naging posisyon kara sa pagsalakay it Russia sa Ukraine kun sa siin sambilog ro atong nasyon sa nagkundina sa ginlunsar nga giyera.
Raya suno kana ro rason makaron it pagtaas it presyo it produktong petrolyo ag pagkaon nga sambilog sa andang gina-obrahan it pamaagi agud nga masolusyunan.
