KALIBO, Aklan—Mabahoe ro naging pagpasaeamat it pamilya Ambay sa Kalibo Municipal Police Station ag iba pang law enforcement agency sa madasig nga pagkaresolba sa ginakabig nga brutal nga pagpatay kay Bonna Hercia Ambay, manager-reliever it RD Pawnshop Mabini St. Kalibo Branch.
Suno kay Atty. Benjamin Candari, Jr. lolo it biktima ag abogado it pamilya Ambay nga bangud sa madasig nga pag-aksyon it kapulisan hay insigidang naaresto ro nagapangunang suspek sa krimen nga si Mark Archie Torrefiel, 31 anyos, ro guwardiya nga naka-duty sa nasambit nga pawnshop.
Samtang, uman man nga nagpaabot it pagpasaeamat ro pamilya sa naging inisyatibo ni incoming Kalibo mayor Juris Sucro nga nauna eon nga nagtanyag it padya nga P30,000 hasta nga nag-abot ro reward money sa P120,000 kamana man ro pagsubaybay it alkalde sa development it kaso hasta nga maaresto ag gindaea ro suspek sa kampo krame ko Huwebes nga adlaw.
Ginkilaea man ni Atty. Candari ro bulig it katapo it media nga naghimay sa isyu ag nagpatigayon it kaugalingon nga imbestigasyon.
Madumduman nga ko Hunyo 6 it agahon hay nasapwan nga nagapaligos sa anang kaugalingon nga dugo si Ambay sa sueod it anang ginatrabahuhan.
Ro 23-anyos nga daeaga hay nag angkon it 18 tanan nga igo it pagbuno sa nagkaeain-eain nga parte it eawas kun sa siin ap-at kara ro patal partikular sa anang leog, dughan, tiyan ag likod it dueunggan.
Sa hot pursuit operation makataliwan ro haeos ap-at nga adlaw hay naaresto it gintingob nga pwersa it Kalibo PNP, Criminal Investigation and Detection GROUP ukon CIDG-NCRFU, National Intelligence Coordinating Agency (NICA) ag CIDG Aklan ro suspek sa Brgy. Pinagbuhatan, Pasig City.
Nagapangatubang si Torrefiel sa kasong Robbery with Homicide.
Sa inisyal nga imbestigasyon, nagatuhaw ro anggulong pagpanakaw nga nauli sa pagpangbuno ro motibo sa pagpatay.
