KALIBO, Aklan—Padayun nga nagakasubo ro pamilya Ambay kasunod it pagkamatay it biktimang si Bonna Hercia Ambay, reliever branch manager it sangka pawnshop sa banwa it Kalibo.
Ginpahayag ni Atty. Benjamin Candari Jr., nga hasta makaron hay indi gihapon mabaton it andang pamilya ro pagkamatay it biktima.
Pilang adlaw eon suno kana nga owa it maayos nga tueog ro mga ginikanan ag igmanghod it biktima bangud sa sobrang kasakit ag kasubo nga ginabatyag.
Nasayuran nga daywa eamang sanda nga magmaeanghod ag puro mga babaye kung siin si Hercia ro bunso.
Base sa inisyal nga impormasyon, nakaangkon it napueo nga tama it pagbuno sa nagkaeain-eain nga parte it eawas ro biktima nga gintunaan it anang kamatayon sa sueod mismo it pawnshop kun siin imaw nagatrabaho.
Samtang, nagapabilin man nga at large ro gwardiya ag ginakabig nga person of interest nga si Mark Archie Torrefiel, 31-anyos it Brgy. Cajilo, Makato matapos nga insigidang magpaeagiw paadto it Metro Manila.
Kapin sa P120,000 ro padya sa sin-o man nga makaturo sa presenteng lokasyon it suspek.
