BANGA, Aklan—Ginapilit ni Rosebelle Flores, ina it 15 anyos nga si Jhuros Flores nga maibalik sa normal ro andang pagpangabuhi aeang-aeang sa anang sambilog pang unga.
Raya ro anang ginpahayag matapos nga kamustahon it bombo news team ro andang kahimtangan haeos daywang domingo ro nagtaliwan matapos ro pagka-eumos it anang panganay nga unga sa aklan river nga sakop it Brgy. Polo, Banga.
Suno kana nga sa anang kaadlawan kahapon, Pebrero 11 hay nagpamisa sanda kun sa siin anang ginpahayag nga owa imaw it ibang ginahinyu makaron hay kundi nga makita maskin ro anang eawas eon lang .
Samtang, mabahoe man ro anang pagpasaeamat sa tanan nga mga nagbulig ag nag-unong sa oras it andang kalisod .
Sa makaron maskin nga opisyal eon nga gin-pundo ro search, rescue and retrieval operation hay nagapadayun suno kana ro monitoring it mga rescue team it Provincial Disaster Risk Reduction and Management Office ukon PDRRMO kabulig ro nagkaeain-eain nga mga MDRRMOs sa kasubaan nga sakop it andang natungdan nga area nga posibleng inanud ro biktima.
Nagapati sigon imaw nga una sa lugar it gin-eumsan nagapabilin ro eawas it anang unga.
Samtang, nagapati sigon imaw sa pahayag it pitong ulihing naka-ibahan it anang unga nga owa it foul play sa natabu , apang kargo de konsensiya sigon nanda kon nagapinuril sanda .
Ginkumpirma man ni Flores nga may pilang indibidwal, kun sa siin, ro iba kanda hay bukon nanda it kakilaea ro nagapadaea it bulig pinansiyal .
Angot kara, nagpaandam imaw sa publiko kontra sa mga scammer ukon mga nagamentaha nga indibidwal nga nagagamit it andang pangaean agud nga makahuthot it kwarta .
May nagbusla sigon kana nga nakapadaea it kwarta apang owa man sanda it nabaton .
