KALIBO, Aklan—Hustisya ro panawagan it mga kapamilya it 42 anyos nga empleyado it sangka banko nga pinatay matapos nga maeapitan nga barilon it riding in tandem samtang nagapungko sa tricycle sa Sitio Looban, Barangay Camanci, Norte, Numancia kaina it agahon.
Suno kay Fermin Magdael, tiyo it biktima ag nakasaksi sa krimen nga gusto man kunta nanda nga buligan ro anang gumankon nga si Jonalyn Arcenio Maribojo, alyas Becha, residente it nasambit nga lugar, apang samtang nagapaeagiw sigon ro mga suspek hay nakatutok kanda ro andang baril ag nag-warning shot pa it daywang beses.
Matapos suno kana barilon it tatlong beses ro biktima hay nahueog raya sa front seat it tricycle rason nga insigidang gindaea sa ospital.
Panawagan eon lang kara sa mga suspek ag mastermind sa krimen nga magsurender eon bangud nga bukon it makatarungan ro pagkamatay it anang gumankon kun sa siin hay mga maintok pa ro anang daywang ka unga nga una sa anang poder.
Nasayuran nga ro biktima hay bueag sa anang asawang si Numancia Sangguniang Bayan member Jocel Maribojo.
