KALIBO, Aklan — Nagapati ro pamilya it dating barangay kagawad nga owa it natabu nga foul play ukon anuman nga makadueuda sa anang pagkamatay.
Nasapwan nga owa eon it kabuhi samtang nakakueob sa baeanaw ro biktimang si Ludovico Irodistan, alyas “Boy Kaeas”, 67, ag residente it Sitio Santa Elena Pelagia Marte Brgy. New Buswang, Kalibo bandang alas-5:00 it aga-aga it Miyerkules, Hulyo 3.
Apang, ginpahayag ni Rosalie Irodistan, asawa it biktima nga mabahoe nga paealigban kanda kon ham-an nga naagto imaw sa nasambit nga lugar it rato nga pang-orason.
Suno kana nga maskin nga may mga paryente sa lugar, apang maeaka raya nga nagapamasyar idtu .
Ulihi nana nga nakita nga buhi ro anang asawa kabi-i nga nagsueod sa anang kwarto pagkatapos nga maka-ihapon.
Aminado man imaw nga naka-inom ro biktima antes nga nagkatueog.
Nakibot eon lang sigon sanda kat gin-agtunan kaina it agahon it sangka residente ag ginpatan-aw kon una sa anang kwarto ro biktima.
Samtang, ginpahayag ni Punong Barangay Arvin Ramos it New Buswang, Kalibo nga maskin nga “Boy Kaeas” ro anang palayaw, apang owa raya it sin-o man nga naka-away sa andang lugar.
Sa kamatuoran suno kana nga natapos nana ro anang tatlong termino sa pagka-barangay kagawad.
Posible sigon nga inatake raya sa anang sakit ukon nadanlog sa karsada, ag bangud nga bukon it masyadong kabisado ro lugar ag medyu madaeum ro baeanaw hay owa raya nakabutwa ag naeumos nga naging rason it anang hinali nga kamatayon.
Nakit-an raya it sangka residente nga ginasugid nga igbata man nana samtang nagabukas it pwertahan kaina it aga-aga sa anang pagbugtaw.
Insigida nga nag-agto ro mga operatiba it Scene of the Crime Operatives (SOCO) it PNP ag Kalibo Municipal Police Station sa gin-eontaran it krimen agud nga matumod kon ano gid ro naging rason it gulping pagkamatay it dating kagawad.
