KALIBO, Aklan — Kinahangean nga magdangop sa nagakaigo nga ahensiya it gobyerno ro pamilya it sangka 60 anyos nga overseas Filipino worker nga tubong Brgy. Ogsip, Libacao ag nagatrabaho bilang construction worker nga namatay sa Turks and Caicos Islands bangud sa ginasugid nga natural death.
Suno kay Atty. Janmar Barrios it Barrios Law Firm nga raya hay agud nga masayuran ro matuod nga rason it anang pagkamatay bangud sa owa nagakasinanto nga cause of death sa anang death certificate nga pneumonia ag ro pahayag it anang mga katrabaho nga nahueog raya sa hagdan it anang gina-istaran nga baeay.
Pwede sigon nga magpangayo it bulig ro anang pamilya sa Department of Foreign Affairs (DFA), Overseas Workers Welfare Administration (OWWA), Embada it Pilipinas ukon sa anang recruitment agency.
Dugang pa ni Atty. Barrios nga ro resulta it autopsy report nga ginpatigayon sa nasyon hay pwedeng maging supporting evidence sa pending investigation nga ginapatigayon it mga awtoridad sa nasambit nga nasyon.
Engkasong may makitang ebidensiya it iregularidad sa autopsy, mabahoe ro posibilidad nga makasuhan ro sa likod it anang kamatayon.
Nauna eon nga ginpahayag ni Maribel dela Cruz, asawa it OFW nga si Gil Ibanez dela cruz nga nag-abot ro bangkay it anang asawa nga nakasueod sa sangka kahon nga ginsakay sakay sa sangka private plane ag gingastusan it kompaniya nga gina-obrahan it anang asawa.
Mabahoe man sigon ro andang pagduda nga may foul play sa anang pagkamatay bangud nga puno it gaob ro eawas it anang mister ag owa eon ro kasudlan kara.
Nasayuran nga ro OFW hay namatay may tatlong buean eon ro nagtaliwan apang gin uli ro anang bangkay sa Aklan ko ulihing domingo eamang it Pebrero it makaron nga dag-on.
