KALIBO, Aklan—Nagapangayo it hustisya ro pamilya it sangka ex-convict nga ginbaril-patay it riding-in-tandem kahapon it hapon sa Sitio Maeobog, Brgy. Calizo, Balete.
Suno kay Jovina Quindong Nerviol, magueang it biktimang si George Quindong, 31 anyos, owa it asawa ag residente it nasambit nga lugar nga samtang nagatikang ro biktima kaibahan ro inang si Visitacion kat gulping may nagaharurot nga motorsiklo halin sa andang likod ag ginbaril it maeapitan ro anang manghud nga tinamaan sa anang leog.
Nakadaeagan pa sigon raya apang gin-eagas it mga suspek ag binaril pa it makapilang beses hasta nga mamatay.
Sa mayad nga swerte ag owa tinamaan ro andang ina nga gintik-eod it anang manghud ag nakadaeagan.
Gusto sigon it andang pamilya nga magapanabat ro mga responsabli nga hasta sa makaron hay padayun pa nga ginatugis it mga pulis.
Padayun man nga ginapaidaeum sa imbestigasyon ro mga posibleng testigo sa krimen.
Nasayuran nga haeos pilang oras pa eamang nga naexperiensiyahan it biktima ro kabuhi nga hilway matapos nga makulong sa Aklan Rehabilitation Center ukon ARC sa sueod it ap-at nga buean sa kasong pagmaoy.
Nauna kara naeakot man ro biktima sa pagpatay sa anang tiyo nga ginbaril man sa nasambit nga lugar.
