BANGA, Aklan—Nagapabilin nga handum ni Joey Flores nga uman nga maka-ibahan ag makita ro anang unga maskin sa ulihing kahigayunan.
Raya hay kasunod it padayun nga pagtinguha it mga otoridad eakip ro mga professional divers nga mausoy ro eawas it 15-anyos nga binatilyo nga si Jhorus Flores nga gina-alegar nga naeumos samtang nagapaligos sa suba nga sakop it Brgy. Polo, Banga ko nagtaliwan nga Enero 29, 2025.
Suno kana nga baton eon man nanda it anang asawa kon anuman ro natabu sa andang unga, apang handum nanda nga makita maskin ro anang eawas eon lang.
Maskin nga pasaway, apang mabuot ag mabinuligon sigon nga klase it unga si Jhorus eabi eon sa trabaho sa sueod it baeay ag pagbantay it andang baraka sa Banga public market.
Samtang, sa makaron hay may ginbo-oe sanda nga serbisyo it mga albularyo nga naghambae nga may nagahawid nga engkanto ukon diwata nga naga-istar sa nasambit nga lugar sa anang unga rason nga indi makabutwa.
Ginaeauman nga ro tawas ukon pagban-aw it albularyo ro makabulig agud nga mausoy ro naduea nga binatilyo sa parte it suba nga ginasugid nga anang gin-eumsan.
Nag apela man sanda it pangamuyo sa pageaum nga pinaagi kara hay makita eon ro eawas it biktima sa mas madali nga tiempo.
