KALIBO, Aklan — Plano makaron it pamilya Roque nga magpangayo it bulig sa National Bureau of Investigation (NBI) agud nga uman nga maimbestigahan ro pagpatay ag paghimueos sa 23-anyos nga babaye nga nasapwan ro bangkay nga naga-eutaw-eutaw sa kanae it irigasyon bandang alas-5:00 it aga-aga sa Brgy. Mataphao, New Washington ko Agosto 22.
Sa exclusive interview it Bombo Radyo kay Rocelia Roque, ina it suspek nga si Rockson Roque, alyas Bombay, 32, residente it nasambit nga barangay nga gina-kwestiyon nanda ro kasong rape with homicide nga ginpasaka kontra sa anang unga it pamilya Zaulda ag ko New Washington Police Station.
Bukon suno kana it makatarungan nga mabulok sa presuhan ro anang unga bangud sa pagpati nga owa raya it kahilabtanan sa krimen.
Ginadum-ok it pamilya Zaulda si Roque bangud ginaturo nga imaw ro nakitang ulihing nakaibahan it biktimang si Jennifer Zaulda antes nga nasapwan ro anang bangkay nga hubeas.
Nasayuran nga ro daywa hay parehong naghalin sa birthday party it SK official sa lugar kaibahan ro testigo nga si Jelly Zaulda, manghud it biktima.
