Nagpangayo it pasaylo ro dating British pirate radio station sa mga pumueuyu it United Kingdom ag sa hari matapos kara nga aksidenteng maipahayag ro saea nga balita angot sa kamatayon ni King Charles III.
Suno sa pahayag it istasyon, ro insidente hay tuga it computer error sa andang nagapangunang studio sa Maldon, Essex, nga nagresulta sa saea nga pag-activate it “death of a monarch procedure” nga kaeabanan nga naka-standby sa mga UK broadcast stations.
Insigida raya nga gin-koreksyunan it istasyon matapos mataeupangdan ro problema, ag nagpaguwa sanda it on-air apology. Ginklaru it management nga raya hay sangka teknikal nga pagkasaea ag owa ginasuportahan bilang matuod nga balita.
Nagpangayo man it pasaylo si station manager Peter Moore sa hari ag sa mga tagpaeamati, ag ginasugid nga maksueubo ro naging epekto it insidente.
Ro nasambit nga estasyon it radyo, nga gintukod ko 1964 bilang pirate radio station nga nagsukoe sa monopolyo it BBC, hay nauna nga nag-operate halin sa mga barko sa dagat bago eubusan nga nagbag-o ro operasyon kara sa masunod nga mga dekada.
Kat matabu ro insidente, sa Northern Ireland kato si King Charles III kaibahan si Queen Camilla para sa sangka royal engagement, ag owa man it kumpirmadong anumang hitabu nga may kaangtanan sa saea nga report.
Padayun man nga ginapadumdum it nasambit nga istasyon nga raya hay isolated technical error ag nagapangayo sanda it pag-intindi halin sa publiko.
