Sangka 35-anyos nga eaeaki sa India ro masobra sa sang dag-on nga gin-alagaan it anang pamilya maskin nga imaw hay namatay eon ko Abril 2021.
Raya hay bangud sa rason nga gineaum it anang pamilya na-comatose eamang imaw.
Ko Abril 19, 2021, na-admit sa ospital si Vimlesh Sonkar bangud sa severe COVID-19
Matapos ro tatlong adlaw sa ospital, binawian raya it kabuhi.
Nagpaguwa eon it death certificate ro ospital apang indi raya pagbatunon it anang pamilya.
Imbis nga i-eubong, gin-uli nanda ro anang bangkay sa andang baeay sa pagpati nga naka-coma eang raya ag mabugtaw man sa ulihi.
Base sa report, owa it mabo-oe nga klaru nga rason ro mga pulis kon ham-an nga indi pagbatunon it pamilya ni Sonkar ro anang pagkamatay.
Sa sueod it sang dag-on ag limang buean, ginbueus-bueusan nga alagaan it pamilya ro bangkay ni Sonkar.
Ginalimpyuhan nanda raya it disinfectant three times a day, ginabayluhan it eambong adlaw adlaw ag 24/7 nga bukas ro aircon sa kuwarto kun sa siin raya nakahamyang.
Natukiban ro “mummified” nga eawas ni Sonkar kat nagbisita ro mga kaibahan kara sa trabaho agud nga imbestigahan kun ham-an nga sang dag-on eon raya nga owa nagasueod sa opisina.
Umpisa nga owa eon nagasueod sa trabaho si Sonkar, mga igmanghud eon lang kara ro andang nakaka-istorya sa telepono ag ginahambae nga may sakit sigon raya.
Kat ginreport it mga kaopisina sa pulis ro angot kara, dikara pa eamang nabaton it pamilya ni Sonkar ro kamatuoran.
Sa atubang it mga pulis, ginpaidaeum sa cremation ro bangkay ni Sonkar.
Bangud nga owa man it krimen nga nahimo, owa it pagakasuhan ro mga awtoridad.//
