KALIBO, Aklan— Pagataw-an it One Day Pass it Boracay Security Committee it Inter Agency Task Force ro mga bukon it taga-isla nga gustong magbakasyon sa Boracay sa sueod eamang it sang adlaw.
Suno kay Caticlan Jetty Port Administrator Nieven Maquirang nga kinahang-ean nga mag-aywan ro bakasyunista it sangka valid ID sa security table sa Jetty Port.
Makarondaya man ro kinahang-ean nga obrahon it mga collector ukon may deliveries nga may sang adlaw nga transaksyon sa Isla.
Ginklaru man ni Maquirang nga ro mga Aklanon hay indi eon kinahang-ean nga magbayad it terminal ag environmental fee.
Apang obligado nga mag-aywan it sangka ID.
Samtang, para man sa mga non-islander nga may kakilaea ag baeay nga pwedeng tiniran, kinahang-ean nga mag-obra ro nagapanag-iya it baeay it sueat nga sponsored nanda ro bisita ag idtu sa andang baeay magadayun.
Ro sueat hay igapadaea sa Boracay Security Committee pinaagi sa Office of the Jetty Port Administrator.
Sa pihak nga parte, ro mga trabahador sa Isla hay required nga magbo-oe it workers ID pass sa Jetty Port kaibahan ro Malay PESO Occupational Permit, Company ID, certification it gina-obrahan, ID picture ag sangka government issued ID.
Ro dry run sa local tourists hay maga-umpisa sa October 15 hasta 25 samtang ro soft reopening sa mga foreign tourists hay maga umpisa sa October 26.
