KALIBO, Aklan — Mag-eowas kanday Aklan First District Rep. Carlito Marquez ag Second District Rep. Teodorico Haresco, Jr., gusto man ni Partylist Probinsyano Ako Rep. Jose Singson, Jr. nga busisi-on ro isyu sa natabu nga dragon boat tragedy nga ginkamatay it pitong paddlers sa isla it Boracay ko Setyembre 25 it agahon.
Naghinyu si Singson it legislative inquiry agud nga matumod ro mga kabangdanan it aksidente ag makahimo it mga tikang para sa mas hugut nga safety regulations sa mga ginapatigayon nga extreme water sports sa isla.
Tuyo it gindihon nga HB No. 397 ni Singson nga indi eon mauman pa ro trahedya, kun sa siin pito ro patay ag 14 ro nakaeowas matapos hampakon it mabaskog nga humbak ro andang ginasakyan nga baroto samtang nga nagapatigayon it routine practice ro Boracay Dragon Force team, mga 300 meters halin sa bibi it baybay nga sakop it Sitio Tulubhan, Brgy. Manocmanoc.
Nauna kara, nagpangayo man it bulig si Cong. Haresco kay Transportation Secretary Arthur Tugade para sa dugang nga barko it Philippine Coast Guard nga magapatrolya sa bilog nga isla it Boracay agud nga insigidang makaresponde sa oras it emerhensiya ag pag-eowas sa mga biktima it aksidente.
