Ginpaeawig ni US President Donald Trump ro ceasefire sa Iran, adlaw it Martes, Abril 21 ukon pilang oras antes raya nga ma-expire para padayun nga makapatigayon it peace talks ro daywang nasyon.
Sa pahayag, ginpaabot ni Trump nga nagpasugot imaw sa hinyu it Pakistan, nga nagpanguna sa peace talks, kun sa siin, indi anay magapatigayon it mga pag-atake sa Iran hasta nga ro andang mga lideres ag representante hay makabilog it unified proposal.
Suno kay Trump, nagdesisyon imaw nga paeawigon ro ceasefire bangud nga ro gobyerno it Iran hay masyado eon nga paralisado nga nagatumod sa mga pagpatay it US ag Israel sa pilang lider it nasyon kaibahan si dating Supreme Leader Ayatollah Ali Khamenei, nga ginbayluhan man it anang unga.
Libo-libong indibidwal ro namatay umpisa nga mag-eontad ro giyera sa nagkaeain-eain nga nasyon sa Middle East, ag nagtuga man it grabeng epekto matapos isarado ro Strait of Hormuz.
Ginpahayag ni Trump nga padayun nga pagabaeabagan it US Navy ro mga pantalan ag baybayon it Iran, nga gintawag it mga lider it Iran bilang act of war.
