KALIBO, Aklan—Bangud sa mga nagkaeatumba nga puno it butong ag pagkaputoe it mga linya it kuryente bangud sa mabaskog nga hangin ag uean tuga it Bagyong Egay ro rason kon ham-an nga naka-experiensiya it patay-sindi nga supply it kuryente ko nagtaliwan nga mga inadlaw.
Suno kay Engr. Jude Ropa it engineering department it Aklan Electric Cooperative ukon Akelco nga hasta sa makaron hay nagapadayun ro andang maintenance upgrade ukon pagkumpuni partikular sa mga kabarangayan.
May mga kahigayunan suno kana nga matapos nga maka-ayad ro ginreklamo nga linya hay uman nga nakakabaton it tawag bangud sa uman nga nagakinahangean it repair.
Ginpaathag pa ni Engr. Ropa nga ro pilang naexperiensiyahan nga power interruptions hay tuga it pagkasamad it linya it National Grid Corporation of the Philippines ukon NGCP.
Sa pihak nga parte, gindugang pa it Akelco nga sa masobra sa 700 nga mga poste nga kinahangean nga ma-relocate hay haeos 200 eon ro natigayon nga matapos ukon 30% sa gintaeanaan nga pondo it Department of Public Works and Highways ukon DPWH.
Amat-amat sigon ro andang pagtrabaho bangud nga nagatuga it power interruptions kon pag-ayos sa mga linya kon dere-deretso nga pagpatigayon it relocation.
