Mas pa nga ginpabaskog it Philippine National Police (PNP) ro andang kampanya kontra sa mga ‘fixer’ nga nagapamentaha sa bulig pinansyal it gobyerno sa tunga it krisis sa suplay it enerhiya.
Ginpasiguro ni PNP Chief Police General Jose Melencio Nartatez Jr., nga indi makaeusot ro mga manugloko nga nagapamentaha sa mga pamilya nga nagakinahangean it ayuda.
Paandam it PNP, nga nagapadayon ro manhunt kontra sa mga fixer nga nagapangayo it bayad kabaylo it gina-alegar nga madasig nga pagtau it ayuda.
Nauna eon ginpaathag it Department of Social Welfare and Development nga libre ro tanan nanda nga serbisyo ag owa it sin-o man nga otorisado nga magpanukot para sa ayuda.
Gin-abisuhan man ro publiko nga indi basta-basta nga magpati sa mga mensahe ukon offer kabaylo ro personal nga impormasyon.
Ginmanduan man ro tanan nga local police nga mas pa nga hugtan ro pagbantay sa mga lugar kun sa siin ginapanupod ro mga ayuda para mabaeabagan ro mga nagapamentaha.
