KALIBO, Aklan—Sa pagpanaeasa it bagyong Egay ag habagat, pilang mga insidente sa kaeawran ro nailista it Philippine Coast Guard sa Western Visayas.
Suno kay PCG-Region 6 Spokesman Coast Guard Commander Jansen Benjamin nga sangka barko ro sumadsad sa matapos nga masamad ro angkla rason nga gin-anod it mabaskog nga hangin ag humbak sa manabaw nga parte it kaeawran nga sakop it Bugasong, Antique.
Presenteng eowas ro mga sakay it barko nga ginaeakipan it kapitan ag mga crew kamana man nga owa raya nagtuga it oil spill.
Samtang, sangka baroto man ro nagkueob sa Banate, Iloilo ag maswerteng naeowas ro mga sakay kara it naka standby nga mga tawuhan it bantay-dagat, PCG ag Municipal Disaster Risk Reduction and Management Office.
Samtang, patay eon kat marekober ro sangka indibidwal sa South Negros matapos nga maeumos.
Sa pihak nga parte, kabulig ro PCG, pilang mga residente ro ginbakwit bangud sa mga pagbaha sa Bacolod City nga sa mayad nga swerte hay owa it nailistang major casualty.
Gindugang pa nga ro numero it mga na-stranded nga pasahero sa Caticlan Jetty Port hay nag abot sa 315 ag 70 nga rolling cargoes, apang sa pagmayad it tiempo hay nakabiyahe eon ro mga raya.
Ginpahayag ni commander Benjamin nga pilang biyahe pa paagto sa Bulalacao, Mindoro halin sa Caticlan ag Cadiz paagto sa Daan-Bantayan ro nagapabilin nga kanselado.
Balik eon man sa normal ro biyahe it mga roro vessel ag fast craft halin sa Iloilo paagto sa Bacolod City.
Suno sa PCG nga padayun sanda nga naka alerto ag ginapadumdum ro mga mangingisda nga likawan anay nga mag-eayag bangud nga delikado sa mga maintok nga sakayang pandagat ro mga mabaskog ag mabahoe nga humbak.
