KALIBO, Aklan—Hugut ro ginapatigayon nga pag-monitor makaron it Provincial Drug Enforcement Unit ukon PDEU-Aklan sa mga nagaduso it iligal nga droga.
Suno kay PLTCOL Frenzy Andrade, head it PDEU-Aklan nga raya ro kabangdanan kon ham-an nga sunud-sunod ro andang operasyon nga kaeabanan nga naging madinaeag-on matapos nga madakpan ro mga pusher ag user it droga.
Ro pinaka-ulihi nanda nga nadakpan hay ro 19 anyos nga si John Noel Antonio, tumandok it Bagong Barrio, Caloocan ag presenteng naga-istar sa Alimbo, Baybay sa banwa it Nabas sa ginpatigayon nga drug buy-bust operation kabi-e sa Sitio Agutay, Brgy. Aquino, Ibajay.
Ap-at nga sachet it ginadudahan nga shabu ro narekober sa anang posesyon ag kontrol nga nagabalor it kapin sa 9,000 pesos.
Apang sa pag-usisa sa lugar , mga 25 metros ro distansiya, narekober nanda ro ginpamaea nga dahon it marijuana nga ginputos it bond paper ag ginsueod sa plastic it pancit canton.
Hugut suno kana ro andang pagsurveillance sa suspek bangud nga kaeabanan nga ginagamit kara nga runner hay mga menor de edad.
Haeos online sigon ro anang transaksyon sa pagbakae it shabu ag marijuana sa metro manila ag ginapasueod it aklan pinaagi sa courier service.
Mabahoe man sigon ro andang pagduda nga hasueod eon it sindikato ro mga courier company bangud sa padayun nga pag-eusot imaw it mga illegal nga kontrabando.
Samtang, kaabuan suno kana sa mga nagasueod makaron nga droga sa aklan hay marijuana.
Kaeabanan man sa mga nadakpan hay dati eon nga naaresto ukon drug surrenderee bangud nga gina-usoy-usoy sigon it andang eawas ro droga.
