KALIBO, Aklan—Mas delikado ro pertussis ukon whooping cough sa mga inunga kaysa sa mga katigueangan.
Suno kay Dr. Philip Ian Padilla, public health expert nga indi dapat balewalaon sa baylo hay magpakonsulta eagi sa doktor ukon pinakamaeapit nga health center ro sangka may sakit nga makitaan it mga sintomas it pertussis.
Ginpaathag ni Dr. Padilla nga ro nasambit nga sakit hay eubus nga makataeapon rason nga ginalaygay nanda nga magpabakuna kontra pertussis.
Mabawasan sigon it bakuna ro posibilidad it grabeng mga komplikasyon halin sa pertussis nga makamaeatay eabi eon sa mga eapsag.
Importante sigon nga pabakunahan ro mga unga nga naga-edad it 6 weeks hasta 23 months agud nga mas eowas kontra sa mga makataeapon nga sakit.
Naga-umpisa suno kana ro sintomas it pertussis sa sip-on, ubo ag eagnat apang naga-grabe ro pag-ubo sa sueod it sang domingo hasta daywang domingo.
Dugang pa kara nga mabuhayan ro pagbueong sa pertussis ag posibleng magtuga it makamaeatay nga komplikasyon.
