KALIBO, Aklan—Ginduea ni Public Employment Service Office ukon PESO Aklan manager Vivian Solano Ruiz ro kabaeaka it mga overseas Filipino workers maging it anda nga pamilya nga apektado it nagtaliwan nga bagyong Ursula nga uwa gihapon nakabaton it ayuda halin sa Overseas Workers Welfare Administration ukon OWWA.
Suno kana, nadelay eamang ro pagproseso sa andang mga papeles bangud sa Covid-19 pandemic.
Ginklaro nga kwalipikado sanda nga makabaton it calamity assistance provided nga nakumpleto nanda it pagpasa ro mga requirements nga ginpangayo it OWWA.
Apang, uwa pa sigon it abiso halin sa OWWA Region VI kon san-o ro masunod nga releasing.
Ginpaathag nga kon navalidate ag na-approve eon it OWWA ro kumpleto nanda nga requirements, ro releasing hay pinaagi eon it money transfer ag bukon eon it sa Provincial PESO sa Kapitolyo.
Ro OWWA eon sigon mismo ro magatawag ukon maga-text sa mga raya kon pwede eon nanda ma-claim ro andang kwarta.
Voice clip of PESO-Aklan Manager Vivian Ruiz Solano
Samtang sa pihak nga parte, kapin sa P10,000 pesos sigon ro mabaton nga cash assistance it mga repatriated overseas Filipino workers sa idaeom it “Abot Kamay Ang Pagtulong” ukon AKAP it Department of Labor and Employment ukon DOLE.
Mag-eowas kara, makabaton it dugang nga P10,000 pesos sa idaeom it “Balik Pinas” program ro mga uwa eon naila magbalik sa abroad para magtrabaho ag iya eon lang magatinir sa Pilipinas mintras tanto.
Apang, kinahang-ean nanda anay nga mag-apply online ag magpasa it mga ginapangayo nga requirements ag subject for approval gihapon it OWWA.
Sa makaron sigon hay kapin sa P1 bilyon pesos ro gindugang nga pondo it gobyerno sa bilog nga nasyon para sa mga repatraited ofw’s.
