KALIBO, Aklan—Magabulig ro Philippine Army sa pagbantay agud nga mabaeabagan ro extortion activities it New People’s Army ukon NPA sa national and local election sa masunod nga dag-on.
Raya ro ginpahayag ni Army Captain Kim Apitong, Spokesperson it 3rd Infantry Division.
Suno kana nga mas pa nanda nga ginpabaskog ro andang combat operations, info drives ag civil military operations sa mga nabukid nga kabarangayan partikular sa mga ginakabig nga hot spots sa Panay ag Negros.
Nagapahaum sigon makaron nga tiempo ro mga rebeldeng komunista sa pag-kolekta it “permit-to-campaign” nga bayad halin sa mga pulitiko.
Gindugang pa ni Capt. Apitong nga mandato nanda nga masiguro ro pag angkon it malimpyo ag maayos nga eleksyon.
Bangud sigon sa pagpatigayon it mas hugut nga kampanya bukon eamang agud nga mawakasan ro insurhensiya kundi nga masiguro ro malinong nga eleksyon, nagresulta raya sa encounter ko Disyembre 1, 2021 sa Miag-ao, Iloilo nga ginkamatay it masobra sa 9 nga miyembro it NPA kaibahan ro mataas nga opisyal.
