Uwa nagpatinag ro Philippine Coast Guard (PCG) sa presensiya it Monster ship it China nga nakaangkla sa Escoda shoal.
Gin-insister ni PCG spokesperson for the West Philippine Sea Commodore Jay Tarriela nga inde mahadlok ro Philippine Coast Guard ukon inde mag-atras ag inde man pagmanduan ro BRP Teresa Magbanua nga bumalik sa Palawan sandig sa mando it Presidente ag intensiyon it PCG Commandant nga ipabilin ro andang presensiya sa Escoda shoal.
Nauna eon nga ginpahayag ni Comm. Tarriela nga gindeploy ro CCG 5901 ukon Monster ship sa Escoda shoal para hadlukon ro PCG 9701 ukon BRP Teresa Magbanua.
Angot kara, nagpatigayon it radio challenges ro PCG 9701 ukon BRP Teresa Magbanua halin kat nag-abot sa shoal ro nasambit nga higanteng barko it China.
Apang, uwa sigon direktang ginasabat sa parte it China kon ano ro andang intensyon sa lugar sa baylo hay nagapatigayon sigon sanda it lehitimong operasyon it andang Coast Guard bangud nga may una sandang soberaniya sa nasambit nga kaeawran.
