KALIBO, Aklan—Magapatigayon it blood donation activity ro Philippine Red Cross Aklan chapter.
Suno kay Mary Joe Galeon, administator it PRC Aklan nga raya hay kasunod man it selebrasyon it World Blood Donor’s Day hin-ag nga adlaw it Martes, Hunyo 14.
Sa nasambit man nga aktibidad hay mataw-an it importansya kon man-uno ka importante ro regular nga pagdonar it dugo.
Ginataw-an man kara it recognition ro mga regular ag voluntary blood donors.
May kaangtanan kara, gin-engganyo ni Galeon ro publiko nga boluntaryong magdonar it andang hamili nga dugo agud nga makabulig sa nagakinahang-ean ag makasugpon it kabuhi.
Ro blood donation activity hay maga-umpisa it alas-8:00 it agahon hasta alas-2:00 it hapon sa taeatapan mismo it PRC Aklan.
Aminado si Galeon nga inde malikawan nga may kakueangan it supply it dugo sa probinsya it Aklan rason nga eubus ro andang pagpasaeamat sa mga sektor nga nagapatigayon it blood letting activity.
Nasayuran nga haeos adlaw-adlaw hay may nagadangop sa taeatapan it PRC nga nagakinahang-ean it dugo para sa andang pasyente apang bukon it sa tanan nga oras hay bastante ro stock it blood type nga andang kinahang-eanon.
