KALIBO, Aklan—Kabilugan nga 92 nga nagapangunang produkto sa merkado ro nagtaas ro presyo para sa nagahilapit nga holiday season.
Raya ro ginpahayag ni Department of Trade and Industry ukon DTI-Aklan Provincial Director Ma. Carmen Iturralde.
Suno kay Iturralde nga ginpasugtan it DTI nga magpataas it presyo ro nasambit nga mga produkto, kaibahan ro pilang brand it ham bangud sa paeag it African Swine Fever ag pilang Noche Buena items nga may petsang Oktubre 30, 2019.
Minimal eamang sigon ro gintaas it mga produkto nga naga-abot sa piso, limang piso ag napueong piso.
Ginpahayag dugang nga may ginpaguwa eon nga bag-ong listahan it suggested retail price ukon SRP ro DTI para kara.
Apang, ginpahayag it DTI nga indi man masyadong maapektuhan ro mga konsumer bangud nga 134 nga mga produkto ro owa nagpataas it presyo ag 6 pa nga produkto ro nagpanaba it presyo.
Samtang, gin-engganyo man nana ro mga consumer nga bisitahon ro website it DTI para sa tamang pag-giya sa presyo it mga produkto makaron.
Gindugang pa ni Iturralde nga i-report sa andang taeatapan ro mga baealigyaan nga owa nagasunod sa SRP eabi eon ro nagsobra sa gintaeana nga SRP.
Importante man sigon nga may price tag ro mga produkto agud nga masayuran it consumer kon maka-igo pa ro andang budget sa pagpamakae.
Ginklaru man it dti nga ro SRP sa noche Buena products hay separado sa basic necessities and prime commodities.
