KALIBO, Aklan–Uman nga magapasakop sa provincial trade fair ro Aklan Piña and Indigenous Fibers Manufacturers and Traders Association kaibahan ro Department of Trade and Industry ukon DTI Aklan sa Trade Hall, Capitol Grounds Kalibo.
Raya ro ginpahayag ni Anna India Dela Cruz Legaspi, presidente it nasambit nga grupo.
Tuyo sigon it nasambit nga exhibit nga maipakita ro mga bag-ong designs ag produkto it kapin sa 15 nga mga Aklanon entrepreneurs nga miyembro it andang asosasyon, partikular sa pag-obra it piña ag abaca nga tela kamana man nga uman nga mabuksan ro andang koneksyon sa domestic ag international markets nga nauna eon nga napundo bangud sa covid 19 pandemic.
Gindugang pa kara nga gusto man nanda nga ipakita nga ro indigenous fibers hay owa eamang naka focus sa pag obra it tela kundi sa fashion accessories man, home style ag iba pa.
Ginaeauman ni Legaspi nga ro andang event hay maka engganyo it dugang nga buyers.
Ro event hay kadungan sa sang domingo nga selebrasyon it Aklan Day.
Ro exhibit hay pormal nga nagbukas makaron nga adlaw it Biyernes.
