KALIBO, Aklan— Magatau it dugang nga kolor ag kasadya sa nagahilapit nga Kalibo Sto. Niño Ati-atihan Festival ro pag-aeabutan it mga celebrities.
Sa Enero 11 sa Pageant ag Coronation Night it “Mutya it Kalibo Ati-atihan 2019” hay magiging bisita ro mga singer nga sanday Daryl Ong ag Christian Bautista agud nga maga-harana sa mga kandidata.
Kaibahan nanda nga magabisita sa nasambit nga okasyon nga pagahiwaton sa ABL Sports Complex, alas-7:00 it gabi-i ro model/actor nga si Jason Abalos, “That’s My Bae” grand winner Kenneth Earl Medrano ag Asia’s Next Top Model Cycle Grand 5 Grand Winner Maurren Wroblewitz.
Samtang, sa Enero 16 sa Pastrana Park hay magapakilig ro magkarelasyon nga sanday Barbie Forteza ag Jak Roberto kamana man sanday Paul Santos ag Mika Dela Cruz.
Magapasadya man ro pilang mga kilaeang banda kaibahan eon ro Callalily sa “Hala Bira Nights” sa Magsaysay Park umpisa sa Enero 14 hasta 20.
Nasayuran nga naging temprano makaron ro mga nakaplastar nga religious activities para sa festival nga nag-umpisa ko enero 2 kasunod it unang novena ag opening liturgy para kay Sr. Sto. Niño de Kalibo.
