KALIBO, Aklan — Nagpaguwa it hibubun-ot ro pilang mga drivers and operators sa andang ginapangatubang nga kalisod kasunod it padayun nga pagsirit it presyo it langis tuga it kinagamo sa Middle East.
Suno kay Rowam Remojo, driver/operator nga may biyaheng New Washington-Kalibo vice versa nga maskin nga naintindihan nanda nga malisod man sa mga commuters apang mas pabor sanda kon pataasan ro sukot sa pamasahe.
Sa haeos kada domingo nga ginapatuman nga bigtime oil price hike, kun sa siin ro andang ginagamit nga diesel sa andang saeakyan hay naga-abot eon sa masobra sa P100 kada litro, padayun man ro andang pag-antus ag haeos owa eon it gina-uli nga kita sa andang pamilya.
Bangud sa pagtaas it presyo it gasolina, langis, ag maintenance hay mas pa nga nagnaba ro andang kita bangud sa kawad-an it adjustment sa pamasahe.
Masyado sigon sanda nga lugi rason nga kon magadere-deretso ro pagmahae it produktong petrolyo ag piyesa it saeakyan hay posibleng temporaryo sanda nga magapundo sa pagbiyahe.
Samtang, panindugan nana nga bukon it bastante ro ginatau nga P5,000 nga fuel subsidy ag dugang nga P1,500 nga ayuda halin sa DSWD.
Panandalian eamang sigon raya nga solusyon nga indi makasabat sa andang adlaw adlaw nga kinahangean.
Ginkumpirma man nana nga hasta sa makaron hay owa pa sigon nanda nabaton ro nasambit nga mga bulig pinansiyal.
