KALIBO, Aklan—Ginkumpirma ni Atty. Flosemer Chris Gonzales it Aklan Provincial Prosecutors Office ag nagatindog nga chairperson it Regional Task Force on Ending the Local Communist Armed Conflict (ELCAC) nga mabahoe ro posibilidad nga may mga naninahan nga rebeldeng New People’s Army (NPA) sa panibag-ong engkwentru nga natabu sa tunga nanda it Philippine Army, hapon it Biyernes, Agosto 30 sa Sitio Mayodiong, Barangay Manika, Libacao.
Suno kana nga natabu ro bakbakan matapos nga rumesponde ro mga tropa it 82nd Infantry (Bantay-Laya) Battalion sa report it mga residente nga may pilang mga armadong rebelde nga pwersahan nga nagapangolekta kanda it pagkaon ag nagapangikil sa nasambit nga lugar.
Nagbuhay it kapin sa 15 minutos ro engkwentru sa tunga it tropa it gobyerno ag Regional Sentro De Gravidad ag Central Front Komiteng Rehiyon—Panay.
Nakitaan sigon it pilang bakas it dugo sa encounter site rason nga posibleng may mga rebelde nga naninahan sa bakbakan.
Ginpahayag ni Atty. Gonzales nga kaeabanan nga gina-obra nga paeahuwayan it mga NPA ro banwa it Libacao kon nagalikaw sa nagapatrolya nga tropa it gobyerno sa mga boundary it Tapaz, Calinog, Lambunao ag Valderama sa Antique.
Ginakabig sigon nanda ro Libacao nga mobility corridor kun sa siin ulihing naispatan nga may presensiya it NPA nga nagtinir it mabuhay nga paniempo hay ko dag-on 2022 pa.
Samtang, ginapatihan nga ro grupo nga naka engkwentru it militar sa libacao hay kaparehong grupo man it nakabakbakan it 12th Infantry Battalion ko Setyembre 1 sa Barangay Minan, Tapaz, Capiz.
Daywang soldado ro naninahan sa nasambit nga encounter.
Angot kara, panawagan ni Atty Gonzales sa mga nabilin pa nga miyembro it NPA eabi eon ro mga Akeanon nga magbalik eon sa sabak it gobyerno samtang bukon pa it ulihi ro tanan.
Suno kana nga pursigido ro gobyerno nga mabuligan ro mga rebelde nga uman nga mataw-an it tsansa nga makapangabuhi it malinong kaibahan ro andang pamilya ag mga mahae sa kabuhi pinaagi sa amnesty program.
Mag-eowas kara, target sigon it Philippine Army nga madeklara nga insurgency free ro Isla it Panay sa katapusan it buean it Setyembre.
Posible sigon raya nga matabu kasunod it pagkamatay it andang tatlong mataas nga lider kan-o eamang sa pagpanguna ni Ma. Concepcion “Ka Concha” Araneta Bocala sa natabu nga engkwentru sa Iloilo.
