KALIBO, Aklan—Bukas ro PISTON sa isyu it kooperatiba basta ro prangkisa ag unit hay ginapanag-iyahan it sangka miyembro.
Suno kay Moody Toque Floranda, chairman it Pagkakaisa ng mga Samahan ng Tsuper at Operator Nationwide (PISTON), dapat nakapangaean ro nasambit nga propyedad sa sangka miyembro it kooperatiba ag bukon it kapareho sa ginapatuman it gobyerno nga makabig nga pagmonopolyo sa isyu it mga ruta.
Ginapatay sigon kara ro pangabuhian it mga operator kon sa siin ginaboe-oe eamang it sangka mabahoe nga kooperatiba ro ginpangabudlayan nga ginpundar nanda.
Suno pa kay Floranda, katuyuan it gobyerno sa sektor it transportasyon ro makaangkon it mabahoe nga negosyo ag bukon it pag-ayos kara.
Ginaduso sigon it DOTr, LTFRB ag presenteng administrasyon ro negosyo pag-abot sa isyu it serbisyo sa mga pumueuyo.
Sambilog sa mga problema nga ginatan-aw sa modernization program hay ro mga miyembro it koopertiba ro nagabayad sa pagbakae it mga unit.
Suno pa kana nga ro unit ag prangkisa nga ginbakae mismo it mga miyembro hay halin sa anda nga boesa apang uwa man raya nakapangaean kanda.
Nakapangaean mismo sa kooperatiba ro unit ag prangkisa kon siin sanda nakasueod.
Dugang pa ni Floranda nga kon gusto sigon it gobyerno nga maayos ro sektor it trnaportasyon sa nasyon, dapat gina-una nanda ro pagpatindog it kaugalingon nga industiya kon sa siin ro nasyon mismo ro naga-ubra it mga public transport.
Suhestyon pa nana nga inde dapat pagsigidason nga mag-import ro nasyon kon sa siin ginapatay kara ro lokal nga ekonomiya.
Ro ginapaumwad sigon kara hay ro mga dumueuong ag ro mga mabahoe nga mga negosyante sa ibang nasyon.
