Kalibo Aklan —–Nagatingob it pwersa makaron ro Philippine National Police ag Armed Forces of the Philippines sa pagpatrolya sa Barangay Torralba Banga kasunod it napabalita nga may pilang residente ro nakaexperiensiya nga may nagapanuktok sa andang panimaeay it dis-oras it gabi-i.
Suno kay P/Major Jake Barila , hepe it Banga Police Station nga matapos nga magdangop kanda ro Barangay Kapitan it nasambit nga lugar hay insigida sanda nga nakipag-angot sa AFP sa mga tikang nga pagahimuon .
Mas ginhugtan pa sigon makaron ro border patrol umpisa sa boundary it Libacao ag Madalag.
Apang hasta sa makaron hay owa pa it sin-o man nga residente nga nagpa-blotter nga gina-alegar nga nakaexperiensiya it kaparehong insidente nga posibleng kahimuan sigon it armadong grupo ukon indibidwal rason nga indi pa raya makabig nga verified report.
Angot kara, gin-engganyo nana ro tanan nga residente nga maging vigilante ag i-report kanda kon may mataeupangdan nga anuman nga aktibidad it ginadudahan nga CPP-NPA .
Sa pihak nga parte, nagaduda man si barila nga ro insidente hay posibleng kahimuan eamang it mga loko-loko agud nga hadlukon ro mga kaeapitbaeay sa tunga it ginapatuman nga Enhanced Community Quarantine.
Eauman eon suno kana ro makarondaya nga hitabu bangud sa gutom.
Nagpaandam man imaw nga indi pagbuksan it pwertahan ro mga nagapanuktok eabi eon sa dis oras it gabi-i
