KALIBO, Aklan—Umani it pagdayaw halin kay Philippine National Police (PNP) Chief General Guillermo Eleazar ro Kalibo Municipal Police Station sa anang ginpatigayun nga command visit ag inspeksyon kahapon.
Suno sa PNP Chief, kaparte it anang trabaho ro paglibot sa tagsa-tagsa ka mga police unit sa bilog nga nasyon.
Tuyo sigon kara nga masikyar ro kada estasyon it pulisya ag masiguro nga nagasunod sa mga programa kun siin sambilog eon kara ro “Intensified Cleanliness Program”.
Owa man nalikawan ni Eleazar nga dayawon ro inisyatibo it Kalibo PNP sa pagpabilin kara it kalimpyo sa andang nasakupan maskin nga bukon it standard building para sa estasyon it pulisya.
Nagaeaum man imaw nga mag-abot ro tyempo nga makaangkon it kaugalingon nga eugta ag edipisyo nga pagabutangan ro nasambit nga police unit.
Gin-insister pa kara nga importante ro pagiging malimpyo it kada estasyon para maging presentable raya para sa mga pumueoyo nga nagadangop it andang concern ag nagakinahang-ean it bulig it kapulisan.
Nasayuran nga mabuhay eon nga plano it PNP Chief nga magbisita sa probinsya apang bangud sa paiba-ibang quarantine status rason nga napaiway.
