KALIBO, Aklan—Hugut ro naging paandam ni PNP Chief General Dionardo Carlos sa mga kapulisan sa Aklan nga magpabilin nga non-partisan sa maabot nga eleksyon ag indi magtau it anuman nga private services sa mga pulitiko.
Raya hay kasunod it anang pagbisita sa Aklan Police Provincial Office ukon APPO ko domingo nga adlaw, Enero 23.
Suno kay PSSgt. Jane Vega, tagapaghambae it APPO, uman nga gintaw-an it importansiya ni Gen. Carlos ro ginahimo nanda nga internal cleansing policy nga nagatuyo nga malimpyuhan ro linyada it kapulisan.
Nauna eon nga gin-insister it hepe it PNP nga maskin ro sangka pulis hay naka-leave, indi imaw pwedeng magserbisyo sa anuman nga political party ukon indibidwal bangud nga nagapabilin sanda nga aktibong miyembro it PNP.
Gindugang pa ni Vega nga ginpadumdum man ni General Carlos ro angot sa “no take policy”.
Importante sigon nga ipabilin it mga personnel ag opisyal it PNP ro pag-preserve it andang dignidad bilang law enforcers ag public servants nga ro mandato hay magserbisyo ag magprotekta sa mga pumueuyu ag komunidad.
Nasayuran nga nagapangunang katuyuan it pagbisita ni General Carlos sa APPO hay ro pagtambong sa blessing it gintukod nga PRO-6 riders nook nga kauna-unahan sa bilog nga nasyon nga makita sa sueod mismo it kampo.
Raya eon ro ikatlong beses nga pagbisita it opisyal sa APPO.
