Ginpahalin eon sa pwesto si Laguna Provincial Police Office director, Col. Rogart Campo, matapos ituro nga una sa likod it pagkaduea it mga sabungero.
Raya ro ginkumpirma ni PNP spokesperson Col. Jean Fajardo.
Ginpahayag ni Fajardo nga ro pag-relieve sa pwesto ni Col. Campo hay para taw-an it daean ro nagapadayun nga imbestigasyon it Criminal Investigation and Detection Group (CIDG) angot sa kaso it naduea nga mga sabungero ag para malikawan nga maimpluwensiyahan raya.
Si Col. Campo hay gin-akusahan it e-sabong operator ag kilaea nga gambling lord nga si Charlie “Atong” Ang sa naging pagdungog it Senate Committee on Public Order and Dangrous Drugs nga nagbaton sigon it P1 milyon halin kana.
Mag-eowas kara, positibo man nga ginturo si Campo it mga nag-atubang nga saksi sa Senado angot sa gina-alegar nga pagdispatsa sa mga naduea nga sabungero.
Epektibo makaron nga adlaw, naka-assign eon si Campo sa Personnel Administrative Unit it Directorate for Personnel and Records Management (DPRM) samtang nagapadayun ro ginahimo nga imbestigasyon.
