KALIBO, Aklan—Maskin nga mabahoe nga bulig eabi eon makaron nga may pandemya ro online shopping ukon pagbakae it mga produkto sa internet, apang nakakita man sigon kara it kahigayunan ro mga scammers agud nga makapangbiktima.
Angot kara, ginapadahan ni Patrolman Emeritu Frutas Jr. it PNP Regional Anti-cybercrime Unit 6 ro mga online shopper sa posibilidad it online scam.
Nagakatabu suno kana ro online scam kon makipagtransaksiyon ro sangka kostumer sa online seller apang owa raya it nabaton nga produkto ukon “substandard” ro nabo-oe.
Kaeabanan suno kana nga gusto it mga scammer nga makipag-transaksyon sa messenger agud nga maitago ro andang identity.
Nagpaandam man imaw angot sa identity theft ukon nagagamit it identity it iba.
Agud nga makalikaw sa online scam, ginlaygayan ni patrolman frutas ro mga online shopper nga usisaon kun masyadong manami ro andang gina-offer.
Dapat man sigon nga makaangkon it legitimacy check antes nga makipag-transaksyon ukon usisaon it mayad ro litrato it produkto nga ginabaligya sa internet.
Indi man sigon dapat nga basta-basta nga magpati sa mga manami nga review bangud nga posibleng raya hay scam man.
Ginsuhestiyon pa kara nga mas mayad sa gihapon ro cash-on-delivery ukon ro tradisyunal nga pamaagi it pagbayad.
Mas eowas man suno kana nga magbakae sa mga kilaeang app store.
Sa pihak nga parte, ginlaygay it mga otoridad nga indi basta-basta nga itugyan ro account sa iba ag mag-click it mga link nga matukiban sa ulihi nga phishing link gali.
