KALIBO, Aklan–Hugut nga pagbantay ro ginpatuman it Philippine National Police (PNP) kasunod it ika-53 anyos nga anibersaryo it New People’s Army (NPA).
Suno kay Police Major Willian Aguirre it Aklan Police Provincial Office (APPO) nga owa eon ginkinahang-ean pa nga magpasaka it lebel it pagiging alerto para sa NPA anniversary bangud permi man sanda nga nakabantay ag nagapadayun ro ginahimo nga police operation kontra sa communist terrorist group.
Nasayuran nga tradisyunal nga nagapatigayun it pag-atake ro NPA sa mga pulis ag soldado sa adlaw it andang anibersaryo bilang pagpakita it puwersa.
Ginpahayag dugang nga owa sanda nagpanaba it alerto bilang pagpahaum sa nagahilapit nga national and local elections para masiguro nga magiging maayos ag matawhay ro sitwasyon sa Mayo 9.
Kaibahan sa andang pagpahaum hay ro pagtapna sa anumang paeag it terorismo ag karahasan halin sa mga teroristang grupo.
