KALIBO, Aklan — Nagaabot eon man makaron sa 200 pesos ro presyo it live weight nga baboy.
Paathag ni Engr. Jun Agravante, presidente it Federation of Livestock, Hogs and Poultry Raisers nga raya hay kasunod it pagkontrol it pagdeliver it buhi nga baboy maghalin sa Mindoro.
Ko kasagsagan sigon it kawad-an it supply it baboy bangud sa pagtama it African Swine Fever hay nag-import ro probinsya it Aklan sa kaiping nga mga kaprobinsyahanan partikular sa Mindoro.
Apang, sa makaron hay kontrolado eon ro pagpasueod kara sa Aklan rason nga nagtaas eon man ro presyuhan it buhi nga baboy.
Bangud kara, eauman sigon nga magamahae eon man ro presyo it karne kara sa mga pampublikong merkado.
Nasayuran nga may mga hog raisers sa gihapon nga uwa nakabawi ag uwa pa nagbalik sa pag-alaga it nasambit nga sapat sa kahadlok nga uman nga iguon it African Swine Fever ukon ASF virus.
